Se penso ai tempi bei

Ghe se dei scaraboci nea vita mia,
e mi voria (come se faseva da putei)
strapasar i giorni bruti e butarli via
e de tenir un quaderno dei più bei.
Però se penso a quando gero fio,
anca se co eà fame se faseva eà guera,
mi sensa esitar tornaria indrio,
per respirar quell'aria che ghe gera.
Ghe gera un'aria spensierada, un'allegria,
e penso ae done che sogava eà tombola su eà cae:
e do ochete! ciamava eà sora Maria,
eà dona che teneva el carteon e misiava e bae.
De istà se andava a nuar tutti quanti
in fondamenta sul canal deà Giudecca,
de soghi po se ghe ne faseva tanti,
eà corda, el campanon, eà mosca ceca.
Po, quando so cresuo e go trovà eà morosa,
na tosa che par mi se tutta un pregio,
dopo tre ani eà se deventada sposa,
e eà vita ga comincià andar sempre megio.
Ogni ano se trovemo co nevodi i fradei
per far un pranso tutti in compagnia,
e questo me ricorda i tempi bei,
che no ti voressi mai che i andasse via.