Poesie di Salvatore Di Giacomo

• Aggiungi ai preferiti
• Vedi e commenta

Marzo: nu poco chiove
e n'ato ppoco stracqua
torna a chiòvere, schiove;
ride 'o sole cu ll'acqua.

Mo nu cielo celeste,
mo n'aria cupa e nera,
mo d' 'o vierno 'e 'tempeste,
mo n'aria 'e Primmavera.

N'auciello freddigliuso
aspetta ch'esce o sole,
ncopp' 'o tterreno nfuso
suspirano 'e viole...

Catarì, che vuò cchiù?
Ntienneme, core mio,
Marzo, tu 'o ssaje, si' tu,
e st'auciello song' io.

• Aggiungi ai preferiti
• Vedi e commenta

'A retirata

Gioia bella.
pe'te vedé
c'aggio fatto
nun può sapé!

Si putesse parlà stu core,
quanta cose vulesse di';
ma, chiagnenno pe' lu dulore,
io m' 'o scippo, pe' n' 'o sentì!

Napule e nenne belle,
addio v'avimm' 'a di'...
Sentite 'a retirata?
Ce n ' avimmo da trasi!

Dice 'a gente
parlanno 'e me,
ca si parto
mme scordo 'e te!

A 'sta gente stu core mio,
pe' risposta tu fa' vede',
e dincello ca, si part'io,
tiene mmano nu pigno 'e me.

Napule e nenne belle,
addio v' avimm' 'a di'...
Sentite 'a retirata?
Ce n ' avimmo da trasì!

Gioia bella,
te l'aggi' 'a di'
ca dimane
s'ha dda partì!

Statte bona, può sta sicura
c' 'a medaglia voglio turnà!
A stu core tiénece cura,
si nun torno nun 'o jettà!

Napule e nenne belle,
addio v'avimm' 'a di'...
Sentite 'a retirata?
Ce n avimmo da trasì!

• Aggiungi ai preferiti
• Vedi e commenta

Oj pètteno, che piéttene
'e ttrezze 'e Carulina,
damme nu sfizio, scippala,
scippala na matina.

E tu, specchio - addò lùceno
chill'uocchie, addò, cantanno,
ride e se mmira, - appànnete
quanno se sta mmiranno!

Lenzole, addò se stènneno
e ccarne soie gentile,
nfucàteve, pugnitela,
tutto stu mese 'Abbrile!

E vuie, teste d'anèpeta,
d'aruta e resedà,
seccàte ncopp' a ll'àsteco
faciteve truvà...

Mo 'o petteno, che pettena
'e ttrezze 'e Carulina,
è sempre 'o stesso petteno
'e tartaruga fina;

O specchio è de Venezia
e nun ha fatto mossa;
e lienzulelle smoveno
n'addore 'e spicaddossa...

E manco nun me senteno
l1'aruta e 'a resedà:
cchiù ampresso, 'ncopp'a ll'asteco,
Abbrile 'e ff a schiuppà!

E sti scungiure - è inutile -
nn' a ponno cchiù arrivà:
cchiù nfama e cchiù simpatica,
cchiù bella assaje se fa!

• Aggiungi ai preferiti
• Vedi e commenta

Pianefforte 'e notte

Nu pianefforte 'e notte
sona luntanamente,
e 'a museca se sente
pe ll'aria suspirà.

È ll'una: dorme 'o vico
ncopp'a nonna nonna
'e nu mutivo antico
'e tanto tiempo fa.

Dio, quanta stelle 'n cielo!
Che luna! E c'aria doce!
Quanto na della voce
vurria sentì cantà!
Ma sulitario e lento
more 'o mutivo antico;
se fa cchiù cupo 'o vico
dint'a ll'oscurità...

Ll'anema mia surtanto
rummane a sta fenesta.
Aspetta ancora. E resta,
ncantannese, a pensà.

• Aggiungi ai preferiti
• Vedi e commenta

A retirata

Gioia bella.
Pe'te vedé
c'aggio fatto
nun può sapé!

Si putesse parlà stu core,
quanta cose vulesse dì;
ma, chiagnenno pè lu dulore,
io m''o scippo, pè n''o sentì!

Napule e nenne belle,
addio v'avimm''a dì...
Sentite 'a retirata?
Ce n ' avimmo da trasi!

Dice 'a gente
parlanno 'e me,
ca si parto
mme scordo 'e te!

A 'sta gente stu core mio,
pè risposta tu fà vedè,
e dincello ca, si part'io,
tiene mmano nu pigno 'e me.

Napule e nenne belle,
addio v'avimm''a dì...
Sentite 'a retirata?
Ce n ' avimmo da trasì!

Gioia bella,
te l'aggì 'a dì
ca dimane
s'ha dda partì!

Statte bona, può sta sicura
c''a medaglia voglio turnà!
A stu core tiénece cura,
si nun torno nun 'o jettà!

Napule e nenne belle,
addio v'avimm''a dì...
Sentite 'a retirata?
Ce n avimmo da trasì!

• Aggiungi ai preferiti
• Vedi e commenta

Era de maggio

Era de maggio e te cadeano 'nzino
a schiocche a schiocche li ccerase rosse...
Fresca era ll'aria e tutto lu ciardino
addurava de rose a ciente passe.

Era de maggio — io, no, nun me scordo —
na canzona cantàvamo a ddoje voce:
cchiù tiempo passa e cchiù me n'allicordo,
fresca era ll'aria e la canzona doce.

E diceva. "Core, core!
core mio, luntano vaje;
tu me lasse e io conto ll'ore,
chi sa quanno turnarraje! "

Rispunnev'io: "Turnarraggio
quanno tornano li rrose,
si stu sciore torna a maggio
pure a maggio io stonco cca".

E sò turnato, e mo, comm'a na vota,
cantammo nzieme lu mutivo antico;
passa lu tiempo e lu munno s'avota,
ma ammore vero, no, nun vota vico.

De te, bellezza mia, m'annamuraje,
si t'allicuorde, nnanze a la funtana:
l'acqua Ilà dinto nun se secca maje.
e ferita d'ammore nun se sana.

Nun se sana; ca sanata
si se fosse, gioia mia,
mmiezo a st'aria mbarzamata
a guardare io nun starria!

E te dico — Core, core!
core mio, turnato io sò:
torna maggio e torna ammore,
fa de me chello che buò!

• Aggiungi ai preferiti
• Vedi e commenta

Nuttata 'e Natale

Dint'a na grotta scura
Dormeno 'e zampugnare:
dormeno, appese a 'e mura,
e ronfeno, 'e zampogne
quase abbuffate ancora
'a ll'urdema nuvena;
e, ghianca, accumparesce e saglie ncielo,
dint'a chiara nuttata, 'a luna chiena.

Dormeno: a mezzanotte
Cchiù de n'ora ce manca;
e se sparano botte,
s'appicceno bengala,
e se canta e se sona
per tutto 'o vicenato…
Ma 'o Bammeniello nun è nato ancora,
e nun s'è apierto ancora 'o Viscuvato.

Fora, doppo magnato,
esce nfucata, 'a gente:
ccà d'o viento gelato,
p'e fierre d'a cancella,
trase 'a furia ogne tanto…

E c'o viento, e c'o friddo,
ncopp'a paglia pugnente, a ppare a ppare,
dormeno, stracque strutte, e zampugnare.