Al me putén l' è nasù ed Farvèr cuìnndez gioren prìmma par mìga fères pu spetèr con cl' ansjetè ch' at ciapa cuànd l' è drè rivèr al momént e t' sè mìga s' at sì pu narvoz o pu contént. L' è rivè in t' un dopmezdì chéld ch' a parèva primavéra sénsa fères preghèr bombén, par la giòja ed me mojéra ch' l' an vdèva l' ora ed partorìr con di dolor ch' a gh' parèva ed morìr. 'N emosjon acsì mì an l' ava mai provèda cuànd l' ò vìst apén' na nasù, a cridèva cme 'na vìda tajèda. Al gh' ava tant cavì dritt ch' al parèva 'n rìss, il zguànzi ròssi, j òc mèz sarè e 'l zguèrd fìss vèrs ed mì...mì ch' a son al so papà ch' an vdèva l' ora ed ciapèrel in màn acsì dols, acsì tèner, acsì picén bèl cme 'n fjor ed pan porsèn. Al me putén al gh' à j òc blo cme 'l mèr cuànd al me guèrda, al me fa gnìr vòja ed cridèr dala comosjon e dala contintèssa e 'l guardarìss sémper ed contìnnov parché l' è pròprja 'na gràn blèssa. Al me putén l' è bjànch e ròss cme 'na roza, l' è 'n spetàcol guardèrel cuànd al s' arpòza col manén' ni zonti ch' al pèra ch' al préga 'l Sgnor cme par dìr che lu l' è 'l sìmbol dl' amor. Un putén apén' na nasù al fa la felicitè di non e di parént e mì e me mojéra a sèma du genitor contént. Sperèma ch' al véna su 'na brava parson' na e ch' al staga bén, mo ànca s' an srà mìga acsì, par mì 'l srà sémper al me putén.
Commenti