'A vita Mpapucchiato d' 'a speranza 'e dimane l'ommo parla, senza arricietto e cu mille smanie scetanneso ogni matina fa discorse pè tutt' 'a vita; appriesso a lli staggione cu'o core'ncantato se ne va annamurato a spasso p' 'o munno, si mentre corre o passea pè suspirà se ferma, nfilato'o filo d' 'a fantasia, si nun arricama suonne cose o arrepezza pruggetto. Maje cuntento, maje sazio, si spenn' 'a putega d' 'a vanità, 'e cose s'arrobbe cu l'uocchie: 'a meglia rrobb' 'a vò p'isso! Si s'affiata cu na femmena, s'accatta figlie ca danno penziere. Saglie, scenno, corre mmiezzo all'anne ca passano fujenno; cu na smania d'alleria pe'luntano part' 'e pressa affruntann'a vita; cu curaggio aspetta, ca chissà, si pè na vota nu suonno suoje s'avvera! Nu bello juorno, a ntrasatto, senza sciato annanz' ' a na sagliuta, a quatt'uocchie, po' c'appura? Appura ca'na fronna secca è addeventato! Nu filo'e vita appena l'rummane! Senza parlà, appucundruto s'arritira dint'a n'angulo scuro e, pigliannes'a vita comme veno, là, aspetta ca nu colpo'e viento, senza scrupulo e pietà, luntano s' 'o porta dint'a nu fuosse cupo! Comm'a tutto chesto 'e vvote aggio pensato! Mo'o saccio, o'veco, 'o sento ca tutt'o rummore da vita, mo pe'uno, mo pè n'ato, sulo silenzio po' addiventa; sciuè sciuè, a vita s'accucciuleja comm'a nu cane ca s'arretira doppo tanta abbajo, tale e quale a'o rummore 'e na banda ca scassea d'int'a strada'e nu paese, ca quann'a sunat' 'o gran finale, moggia moggia, zitto zitto, s'alluntana e, cchiù nun sona!
Commenti