Pueta si nasci

Passiavu sulu, sulu
cu i pensieri accavallati,
e t' incontru supra a un mulu
Vanni Meli, lu gran vati.

Unni va pi sti viola?
ci dumannu curiusu,
"Vegnu cà pi fari scola
a un pueta prisintusu.

"Si pueta può chiamarsi
cu fa rima e tempu persu
senza scantu di curarsi
nè di metru, nè di versu"

Mi rispunni 'ncipuddatu!
"C'è un ruspigghiu 'nto Parnasu
pi stu criticu 'npruntatu,
saputellu e senza nasu!"

Chistu, pò, nun fussi nenti
si un avissi li pritisi
di vantarisi ca genti
comu u vati du paisi.

Scrivu versi originali
va dicennu a' paisani,
cu virnaculu lucali,
tantu beddi, tantu sani!

Ti lu giuru, ieu li viru,
sti pueti 'mpruvvisati
comu un grossu peri piru
ca ti fà ficu aruttati.

E concluru lu me diri
"Ca pueta si ci nasci
anchi u versu di vagiri,
è un puema di li fasci.