Poesie di Tita Palanca (Lino Gandin)
El menù
Quando el sole va de drio
dei monti de Gnago
e t'on fià se fa note,
fora par l'aria
te senti profumo de mosto,
polenta osèi,
parana, salado rostìo,
bacalà e brasola.
Mi, che sora la tola
go du radici sconsà,
spalanco la porta.
Smissiando so la pianeta
tuti sti odori,
me faso na sena conpleta
a sbafo dei siori.
--
Il menù
Quando il sole scende
dietro i monti d'Ignago
ed è subito notte,
fuori nell'aria
si sente un profumo di mosto,
polenta e uccelli
costine di salame arrostito
baccalà e braciola.
Io che sopra il tavolo
ho un po' di radicchio scondito
spalanco la porta.
Mescolando nella terrina
tutti questi odori
mi faccio una cena completa
in barba ai grandi signori
Versione in italiano di
Miranda Bille - Santorso.
--
Tita Palanca (Lino Gandin) (scheda)
Informazione pubblicitaria rimossa per gli utenti loggati. Registrati.
La sgàlmara
Tirando drio ‘l capelo
a na moreja in càneva,
a go catà na sgàlmara
che la faséa puntelo.
El gera stà me fiolo
che on giorno el la ga messa
de soto del vedolo
parchè ‘l pissasse in pressa.
Fata de piopa straca
co tante broche torno,
la pele xé de vaca
ma dura come on corno.
Sgàlmara de doménega,
sgàlmara da laòro,
col culo del caliero
ghe dava on fià de moro.
E co la coa de mas-cio
mi la tegnéa ingrassà,
sgàlmara pa l’inverno,
sgàlmara pa l’istà.
Me par che sia stà jeri
che slissighéa sol giasso.
Primo dei canonieri,
on gol par ogni sasso.
In stala ghea segnà
sie quadri coi carbon:
saltando in qua in là
zugavo canpanon.
Scola, dotrina, Messa,
Messa, dotrina e scola,
par no fruarle in pressa
me le metéa tracola.
Desso xe naltro vivare,
ancò se marcia in fin
e al posto de le sgàlmare
mi porto el mocassin.
No so se xe ‘l vedèlo,
no so se xe l’età,
ma, che sia bruto o belo,
go senpre i pie giassà.
In giro par le stanse
go noni, go savate,
ma i pie ga le buganse
che senpre me sconbate.
Me sposto come posso
par drito e par roerso;
coi cali che go indosso
camino par traverso.
Oh cara la me sgalmara!
Desmentegà par casa,
dispersa par la caneva,
làssame ca te basa.
La ciapo par na recia
e vedo, boja can!
che se ga fato vecia
la pele de la man.
La ciapo par el spago,
la taco tirar sù,
basandola ghe dago
l’adìo a la gioventù.
--
Tita Palanca (Lino Gandin) (scheda)
