Scritta da: Bepi Zuccollo

La mònega

Co gera bocia pìcolo,
pena finia la guera,
d'inverno giasso o brosema
querzea tre dea la tera.

Ma pur co l'aria rigida
che ne gelava i ossi
naltri ogni dì curivimo
a slissegar sui fossi

co un vecio par de sgàlmare
co le so broche in riga:
nissun badava ai diavoli,
boanse o la fadiga.

E dopo un dì de brividi
se ritornava al gnaro
scaldarse le man gelide
intorno al fogolaro.

E là na soca de àrase
se consumava lenta
a cusinar luganeghe
e brustular polenta.

Dopo dea sena prodiga
e de un filò dormion
sempre vegnea la recita
de requie e orassion;

e po' de corsa in càmara
che gera note fonda:
su par le scale ripide
se rapegava de onda.

Ma fra le querte ruvide
de un leto taconà
stava na vecia mònega
che la tegnéa scaldà

co na fogara rùzene
colma de bronse vive
che mescolarle un atimo
mandava le falive.

Soto i nissoli tiepidi
anca le me boanse
catava refrigerio
te le me frede stanse.

Gratava un poco el cànevo
sgrensando sui scartossi,
ma el caldo de la mònega
meteva in sesto i ossi;

e se partìa coi angeli
sognando un mondo de oro
fin che le forse languide
catava el so ristoro.

Ormai me par dei sècoli
ca gera mi putelo,
ma pur chel tempo rìgido
desso me pare belo;

e ancò coi reumi e coliche
me sola compagnia,
dei tempi de la monega
go tanta nostalgia.
Galdino Pendin
Vota la poesia: Commenta
    Scritta da: Bepi Zuccollo
    Pubblicata prima del 01/06/2004

    Un corno

    Na sera’a me mojere par zugare,
    vedendo un mago a la television,
    ghe xe vegnù la stramba ispirassion
    cussì, par scherso, de telefonare.

    Ciapà la linea, “Cossa ghe domando?
    - la dise ramenando le scarsele –
    Se me marìo fa i corni o xe fedele
    e se xe vero che ‘l so amor l’è grando”

    E ‘l ghe risponde: “Serto el te ama ancora”.
    e sistemando sfera e carte intorno:
    “na volta solo el te ga fato un corno,
    tanti ani fa. Ma no sta pensarghe sora.”.

    Te i maghi mai la ga vudo fede,
    ma sto responso el ga ingardià un sospeto
    che tute ga in tel cor come un baéto
    che sbusa fora quando men se crede.

    Mi alora penso: vuto che par caso
    gai fato i corni e no me sia inacorto?
    Che, se son svejo, mai farìa sto torto,
    gnanca ghin’esse mile soto el naso.

    Ma me vien in mente che Brisìt Bardò
    na note go sognà in me compagnìa:
    che sia successo che par na magìa
    la ze vegnù con mi… a far filò?
    Galdino Pendin
    Vota la poesia: Commenta
      Scritta da: Bepi Zuccollo
      Pubblicata prima del 01/06/2004

      Vin crinto

      Cossa sarìa sto vivare
      se el crinto no ghe fusse?
      un cumulo de russe,
      na perla svalutà.

      Invesse on dono magico
      ne ga fornìo natura:
      col fredo o con l’arsura
      ristoro la ne da.

      El vin compagna intrepida
      la nostra vita intiera:
      che mai no vegna sera
      se nol se ga gustà

      L’aiuta ben a cressare
      l’è el late dei alpini,
      sangue dei contadini,
      forsa del murador.

      Chi un tenpo xè stà zovane
      adesso se consola
      bagnandose la gola
      con un goto de quel bon.

      El vin l’è  el pì infalibile
      rimedio a tuti i mali:
      no serve li ospedali
      a chi lo sappia usar.

      D’inverno con la brosema,
      du goti de bon crinto
      e ‘l fredo vien respinto
      e nol tormenta pì;

      d’istà, col caldo sòfega
      e a stento se respira,
      roversa via la bira
      e serca el crinto san.

      Cavà dal frigorifero,
      o fresco al naturale,
      l’è sempre madornale,
      al pari del brulè.

      Resta par mi la càneva
      El posto prediletto:
      ghe metarìa anca el leto
      par vivar sempre là.

      Oh, fortunà chel Diogene
      Che ga abità na bote :
      altro che dirghe tote!
      filosofo l’è sta.

      Vedòi, tinassi, cànole,
      bóte, fiaschetti, lore
      le ghe darìa splendore
      anca al salon dei re.

      E quando el vin ghe mormora
      Vien profumà la stansa:
      pi morbida fragransa
      al mondo no ghe xè.

      E lora profitémoghe
      fin che la vita dura:
      de meio la natura
      no ga savesto dar ;

      e femo un grande brindisi
      coi nostri goti pieni,
      par vivere sereni
      par mile ani ancor.
      Galdino Pendin
      Vota la poesia: Commenta
        Scritta da: Bepi Zuccollo
        Pubblicata prima del 01/06/2004

        Nina nana

        Du ocioni che sluse dal sono
        e na vose de mama che cuna;
        dal cielo tri quarti de luna
        che varda sta scena incantà.

        Pian pian le do stele se smorsa;
        se sente s-ciocare un baseto,
        se posta le coerte del leto,
        se sente pregare cussì:

        Signor, che te guidi el futuro,
        protegi sta me creatura:
        la vita par lu sarà dura
        te un mondo de rabia strapien.

        In meso a le insidie del male
        e la corussion de la gente
        conservalo sempre inocente,
        Signore, me fido de Ti.
        Galdino Pendin
        Vota la poesia: Commenta
          Scritta da: Bepi Zuccollo
          Pubblicata prima del 01/06/2004

          Vita da can

          Quando la vita xé dura                
          se dise: che vita da can!
          Culpi, disgrassie, paura,
          suarse el tocheto de pan.

          Ma, co mi torno sfinìo,
          braghe e giacheta sbombà,
          sempre mi vedo el can mio
          calmo, te un’ombra butà.

          Lu fa i so salti e le corse,
          mi me strassino i me passi;
          quando lu dorme, mi forse
          el leto me pare de sassi.

          Lu no ga grane o pensieri,
          né lo spaventa el doman.
          Mi, te i me giorni pì neri,
          sogno… na vita da can.
          Galdino Pendin
          Vota la poesia: Commenta
            Questo sito contribuisce alla audience di